تمنيتك تكوني ليا. حبيتك وافتحتلك قلبي
حبيتك بوحد النية. صافية وافية من عند ربي
كنت معاك مغمض عينيا. رايح معاك وين تحبي
المهم تكوني انتيا. والاهم تكوني مكتوبي
بغيتك بالسيف عليا. قلبي حنين وانتي تعرفي
كانت حياتي ضلمة عليا. وجيتي انتي وقفتي جنبي
واقدرتي اضوي عليا. واتهنيت وزال عذابي
وتفاهمنا انا وانتيا. ماتشوفيني مانشوفك تتعذبي
لانك يالغالية عليا. انتي الروح اللى داخل قلبي
ايلا راكي تسمعي فيا. درك اخلاص مانيش نخبي
انا سكتت حتى اطفرت فيا باش حكيت واش كنت مخبي
كان الحب .بالنسبة ليا. حاجة شابة خلقها ربي
لكن..لما لحق ليا. كان هو سباب عذابي
واش فيها لا كنتي ليا. قولي برك واش حابة تطلبي
واش طامعة من هاذ الدنيا. احكيلي باش ندير حسابي
اذا كانت بيك النية انا النية درتها لربي
واذا بيك تعرفي العقلية. لازم عليك انتي تقربي
وايلا تحوسي على التربية. فسري كلامي ليك واحسبي
روحي سقسي الناس عليا. وابداي بعدويا قبل اصحابي
وايلا المشكل فيك انتيا. ماهيش سبة باش تهربي
هاذي الفطرة الانسانية. فيها السلبي وفيها الايجابي
اما..اذا حكمتي عليا. وشفتي المشكل راهو فجيبي
نقولك ربي فهاذ الدنيا. يرزقنا من حيث لا ندري
وكل الرزق اللي فوق الدنيا. والكنوز اللي خلقهم ربي
وواش رافدة الارض هاذيا. وحتى اللي فالبحر مخبي
عمري ماطمعت يكونو ليا. ولا درتهم كامل في حسابي
لانو الكنز بالنسبة ليا. راهو داخل قلبك مخبي
هذاك الحب اللي عزيتيه فيا. واللي راكي بيه تصدي
ماعاطيالو اهمية. وراكي بسكاتك تزيدي في عذابي
ماعلابالكش كامل بيا. عمرك لاقلتي حبيبي
ممكن تحبي كامل الدنيا الا حبيبك منو تهربي
ولما نغيب تحوسي عليا. وكلي ماتحبيش غيابي
مافهمتك مارديتي عليا كلي كاين حاجة وتخبي
وساعات نحس حتى انتيا. ماكيش عارفة واش تحبي
ممكن نتيا تكوني ليا. وممكن ماتكونيش مكتوبي
اقتنعت بالهدرة هاذيا لما قلتي رايحة تتخطبي
كانت لحضة قوية بزاف عليا. ماضحكت مابكيت قلت هاذا مكتوبي
واتمنيتلك بكل واش فيا ان شاء الله تعيشي كيما تحبي
وديري في بالك حتى انايا ربي رح يعطيني وحدة على حساب قلبي
وحدة تحبني غير انايا وتكون طايعتني وطايعة ربي
ونعيشو حكاية شابة ونسميها قصة حبي
ليست هناك تعليقات:
إرسال تعليق